3 Idi nakatugaw ni Jesus iti Bantay Olibo, immasideg a sililimed dagiti adalan ket kinunada, Ibagam kadakami, kaano a mapasamak dagitoy a banbanag? Ken ania ti pagilasinan iti iyaayyo ken iti panungpalan ti lubong? 4 Simmungbat ni Jesus a kinunana, Agannadkayo tapno awan ti mangallilaw kadakayo. 5 Ta adunto ti umay iti naganko, a kunkunada, Siak ti Cristo; ket allilawendanto ti adu. 6 Ket mangngegyonto ti gubgubat ken sayan-saysayan ti gubgubat; kitaenyo ta dikay maringgoran: ta masapul a mapasamak amin dagitoy a banbanag, ngem saan pay a ti panungpalan. 7 Ta tumakderto ti maysa a nasion a maibusor iti maysa a nasion, ken ti maysa a pagarian a maibusor iti maysa a pagarian: ket addanto bisin, ken angol, ken ginggined kadagiti nadumaduma a lugar. 8 Ngem amin dagitoy ket rugrugi laeng ti rigat. 9 Iti dayta a tiempo iyawatdakayonto tapno marigatan, ket papatayendakayonto: ket guraendakayonto dagiti amin a nasion gapu iti naganko. 10 Iti dayta a tiempo adunto ti maitibkol, ket aglilinniputdanto, ket aggiginnuradanto. 11 Ket adunto a sinan-mammadto ti tumakder, ket allilawendanto ti adu. 12 Ket gapu ta umad-adunto ti kinakillo, lumamiisto ti ayat dagiti adu. 13 Ngem ti agibtur agingga iti panungpalan, isunto ti maisalakan. 14 Ket maikaskasabanto daytoy ebanghelio ti pagarian iti intero a lubong a saksi kadagiti amin a nasion; ket iti dayta a tiempo umayton ti panungpalan.

[Korean Revised Version]