1 Gapu iti daytoy, siak ni Pablo a balud ni Cristo Jesus para kadakayo a Gentil, ibagak kadakayo — 2 Nadamagyo ngarud ti maipanggep iti annongen ti parabur ti Dios a naitalek kaniak para iti pagimbaganyo, 3 a babaen iti paltiing ket impakaammona kaniak ti palimed, a kas insuratko a sapasap iti dakdakkel. 4 No basaenyo daytoy, mabalinyo a maawatan ti pannakatarusko iti palimed ni Cristo, 5 a saan a naipakaammo kadagiti annak dagiti tattao kadagiti napalabas a kaputotan, a kas iti panangipakaammona itan iti Espiritu kadagiti nasantoan nga apostol ken propeta a tattaona; 6 nga isu daytoy, a dagiti Gentil ket kapadada nga agtawid, kaduada a kameng ti bagi, ken kaduada a makibingay iti karkari iti uneg ni Cristo Jesus babaen iti ebanghelio. 7 Iti daytoy nga ebanghelio, nagbalinak nga adipen babaen iti sagut ti parabur ti Dios a naited kaniak babaen iti panagtignay ti pannakabalinna. 8 Naited kaniak, a kakkababaan kadagiti amin a nasantoan, daytoy a parabur — a mangiwaragawag kadagiti Gentil iti di matakuatan a kinabaknang ni Cristo, 9 ken mangipalawag iti amin no ania ti pannakaipatungpal ti palimed, a nailemmeng kadagiti panawen iti uneg ti Dios a namarsua iti amin a banag; 10 tapno babaen iti iglesia ket maipakaammo kadagiti panagturay ken kabilegan iti nailangitan a lugar ti nadumaduma a kinasirib ti Dios, 11 segun iti agnanayon a panggep nga inaramidna ken Cristo Jesus nga Apotayo —

[Daan a Patarus]