11 Gapuna lagipenyo a dakayo idi a Hentil iti lasag, a naawagan a "saan a nakugit" dagidiay agaw-awag iti bagbagida a "nakugit"—a kugit nga inaramid ti ima iti lasag— 12 a dakayo iti dayta a tiempo ket adda iti ruar ni Cristo, naisina iti pagilian ti Israel, ken ganggannaet kadagiti tulag ti kari, awan ti namnamayo ken awan ti Dios iti lubong. 13 Ngem ita kenni Cristo Jesus, dakayo nga adda idi iti adayo, immasidegkayon babaen iti dara ni Cristo.

14 Ta isu ti kappiatayo, a nangpagmaymaysa kadagiti dua ket rinebbana ti bakud a manglaplapped iti nagbaetan, 15 nga inwaksina iti lasagna ti pannakaginginnura, dayta ti linteg dagiti bilbilin ken annuroten, tapno iti bagina mabukel dagiti dua iti maysa a baro a tao, a mangipatungpal iti kappia, 16 ken babaen iti krus, mangikappia kadagiti dua iti Dios iti maysa a bagi, a pinapatayna iti rabaw ti krus ti pannakaginginnura. 17 Ket immay isuna a nangikasaba iti kappia kadakayo nga adda iti adayo ken kappia kadagiti adda iti asideg; 18 ta babaen kenkuana addaantayo amin a dua iti pannakaasideg iti Ama iti maymaysa nga Espiritu.

19 Gapuna, dakayo ket saanyon a ganggannaet ken sangsangaili, no di ket kadua a makipagili dagiti sasanto ken kabbalay ti Dios, 20 a naipasdek iti rabaw ti pundasion dagiti apostol ken dagiti propeta, a ni Cristo Jesus ti mismo a kangrunaan a bato iti suli. 21 Iti unegna, ti sibubukel a pasdek ket sangsangkamaysa a maitaktakder ket dumakdakkel a maysa a nasantoan a templo iti Apo; 22 ken iti unegna, dakayo met ket sangsangkamaysa a maipatpatakder a pagtaengan ti Dios iti Espiritu.

[Korean Revised Version]