Pauna
Ti Espiritu Santo ket isu ti Maikatlo a Persona iti "Trinity", nga imbaon ti Ama ken ti Anak tapno agtaeng kadagiti mamati kalpasan ti panakaipangato ni Jesu Kristo idiay langit (Juan 14:16–17; Aramid 2:1–4). Ti trabaho ti Espiritu Santo ket saan laeng a mangliwliwa kadagiti mamati, no di ket mangbalbaliw kadagiti biag, mangted pigsa iti Iglesia, ken mangiturong iti pannakaipannayag ti misyon ti Dios iti entero a lubong. No awan ti Espiritu Santo, ti Cristianismo ket agbalin laeng a sistema dagiti pammati ken nasayaat a sursuro. Ngem babaen iti Espiritu Santo, dagiti mamati ket makapadas iti baro a biag, ti Iglesia ket agbalin a sibibiag a bagi ni Cristo, ken ti misyon ti Dios ket agtultuloy a dumanon iti amin a nasion.
Babaen daytoy a pannakaawat, sukimaten tayo no kasano a balbaliwan ti Espiritu Santo dagiti namati, ti Iglesia, ken ti misyon ti Dios, nga ipakitana a ti trabahona ket napateg iti biag ken panagserbi ti maysa a Cristiano.
1. Ti Espiritu Santo ket Balbaliwanna dagiti Mamati
Ti umuna a trabaho ti Espiritu Santo ket ti personal a pannakabalbaliw ti tao.
Balbaliwanna:
- Dagiti pusotayo – manipud iti panagsukir iti Dios agingga iti panagayat Kenkuana.
- Dagiti pampanunottayo – manipud iti naindagaan a panunot agingga iti panunot a naisentro ken Cristo.
- Ti kababalintayo – babaen iti panangparang ti bunga ti Espiritu.
- Dagiti tartarigagaytayo – sukatan dagiti naimbubukodan a tarigagay iti puso a naayat a mangparagsak iti Dios.
Ti Espiritu Santo ket saan laeng a mangtarimaan iti aramidtayo a akinruar; aramidenna tayo a maysa a baro a tao. Ti mamati,a kanayon a mangipalubos iti panangituray ti Espiritu ket agtultuloy a umasideg ti pannakaipadana ken Cristo.
Saludsodem ti bagim: "Ti biagko kadi ket agbalin a kaasping ni Jesus?" Ti espirituan a kinataeng ket saan a masukat iti adu ti ammo tayo, no di ket iti kasano a makita ni Cristo iti biagtayo.
2. Ti Espiritu Santo ket Balbaliwanna ti Iglesia
Ti Espiritu Santo ket saan laeng a mangbalbaliw kadagiti indibidual; aramidenna tayo napnapnuan iti Espiritu.
Balbaliwanna ti Iglesia babaen iti:
- Panagtiponna kadagiti mamati uray adda nagdudumaanda a pakasaritaan, kultura, wenno biag.
- Panangitedna kadagiti naespirituan a sagut tapno agserbi iti ministerio.
- Panangpataud iti pudno nga ayat ken panagkakadua iti tengnga dagiti mamati.
- Panangpabilegna iti panagdayaw, kararag, ken panangaramid kadagiti adalan ni Cristo.
- Panangpasayaatna iti bagi ni Cristo tapno mataengan iti naespirituan.
Ti Iglesia a napno iti Espiritu ket saan a mabigbig laeng a babaen kadagiti maganas a programa, no di ket babaen iti nasantoan a panagbiag, panagkaykaysa a naibatay iti Sao ti Dios, panagayat a nabuyugan iti panagsakripisio, ken napudno a panagserbi.
Ti Iglesia ket saan kuma nga agtalek iti sirib ti tao, kadagiti kababalin dagiti tattao, wenno kadagiti estratehiya. Ti kadakkelan a kasapulantayo ket ti agtultuloy a pannakapno ken pannakaidalan tayo babaen iti Espiritu Santo.
3. Ti Espiritu Santo ket Balbaliwanna ti Misyon
Ti Espiritu Santo ket isu ti mangiturong ken mangted pigsa iti misyon ti Dios.
Isu ket:
- Mangted iti kinatured tapno maikasaba ni Cristo.
- Mangidalan no sadino ken kaano nga agministerio.
- Manglukat kadagiti puso tapno awatenda ti Naimbag a Damag.
- Mangipaay kadagiti naespirituan a sagut tapno epektibo iti panangikasaba ken panagserbi.
- Mangpapigsa kadagiti misionero iti panawen ti rigat, pannakaidadanes, ken pannakaparigat.
Ti libro ti Aramid ket kanayon nga ipakitana a tunggal kangrunaan a pannagdur-as ti Naimbag a Damag ket mapasamak babaen iti panangidalan ken pannakabalin ti Espiritu Santo.
Ti misyon ket saan a matungpal babaen laeng iti pigsa wenno kabaelan ti tao, no di ket babaen iti pannakabalin a naggapu iti Dios.
Ti saludsod ket saan a, "Kabaelak kadi nga agserbi iti Dios?" no di ket, "Naisukok kadi iti amin a paset ti biagko iti Espiritu Santo a mangmangted kaniak iti pannakabalin nga agserbi Kenkuana?"
Pangrikep
Ti Espiritu Santo ket isu ti nadiosan nga Ahente ti Dios iti pannakabalbaliw. Isu ti mangpabaro iti biag dagiti managbasol, mangpasanto kadagiti mamati, mangted kadakuada iti pannakabalin nga agserbi, mangtipon iti Iglesia iti panagkaykaysa, mangipaay kadagiti naespirituan a sagut, mangidalan iti ministeriona, ken mangiturong iti misyon ti Dios agingga iti kauddian dagiti daga.
Ti pannakabalbaliw nga iyegna ket naan-anay. Balbaliwanna dagiti puso, pasayaatenna dagiti komunidad dagiti mamati, ken ipannayagna ti Naimbag a Damag iti nadumaduma a kultura ken nasion.
No dagiti mamati ket agtultuloy a mangisuko iti biagda iti panangituray ti Espiritu Santo, ad-adda nga agbalinda a kas ken Cristo. No ti Iglesia ket sumurot iti panangidalan ti Espiritu Santo, dumakkel iti panagkaykaysa ken espirituan a kinamatured. Ken no ti Espiritu Santo ket mangted iti pannakabalin iti misyon, ti mensahe ti pannakaisalakan ket dumanon kadagiti amin a nasion.
Gapuna, ti Iglesia ket saan kuma nga agtalek iti bukodna a pigsa wenno kabaelan, no di ket iti agtultuloy a kaadda ken pannakabalin ti Espiritu Santo tapno matungpalna ti panggep ti Dios a mangsubbot iti lubong.
References
- John 14:16–17; Acts 2:1–4; Systematic Theology (Grand Rapids, MI: Zondervan, 2020), 691–696.
- John 16:7–15; Romans 8:1–17; The Holy Spirit (Downers Grove, IL: InterVarsity Press, 1996), 15–33.
- John 3:5–8; Titus 3:5; 2 Corinthians 5:17.
- Romans 8:9–14; Ezekiel 36:26–27.
- Galatians 5:22–23; 2 Corinthians 3:18.
- 1 Corinthians 12:4–27; Ephesians 2:19–22.
- Ephesians 4:1–16; Acts 2:42–47.
- Acts 1:8; Acts 13:2–4.
- Acts 4:31; Acts 8:29; Acts 10:19–20; Acts 16:6–10; The Book of Acts, New International Commentary on the New Testament (Grand Rapids, MI: Eerdmans, 1988), 28–35.
- Romans 8:29; 1 Corinthians 12:4–11; Ephesians 4:11–16; Paul, the Spirit, and the People of God (Grand Rapids, MI: Baker Academic, 1996), 37–72.